Domaine des Faverges

Am Samschtig bini wieder emou am Gänfersee gsy. Genauer gseit am Wyfescht in Epesses. Mit ere Equippe sy mer vo Chäuer zu Chäuer dr nöi '06-er Johrgang go deguschtiere. Zum z'Mittagässe hey si zmitts im Dorf ä ganzi Chue (!) am Spiess gha. Mues säge, die isch no guet gsy.

Eigetlech hey mer de zFuess dür zschöne Dézaley wöuä spaziere. Aber wüus grägnet het wie us Chüble sy mer du när mit emne Büsli wyter zum "Domaine des Faverges" oberhaub vo St-Saphorin.

Ds "Domaine des Faverges" isch zRäbguet vom Kanton Friburg und het sogar säuber ä Isebahn-Aaschluss! Grad hingerem Huus hey si extra äs Perrönli bout (öppe zchlynschte Perron vor Schwyz). Extra für üsi Gruppe het du när dr "Train de Vignes" ä Extrahaut gmacht...