BeeTagg

Üsi Natels wärde immer wie moderner. Ufem Natel im Internet umesörfe isch mittlerwile keys Problem me. Doch d’Iigab vode Internetadrässene isch müehsam und zytroubend.

Für das gits jetzt Abhiuf, nämlech sogenannti 2D-Codes. Dasch ä Witerentwicklig vode Strichcodes. Die 2D-Codes übernähme dRouä vom Link im Internet. Aber wie geyt jetzt das genau mit em Natel?

Ds Zouberwort heisst „Mobile-Tagging“ und funktioniert eso: Mit dr Kamera vom Natel fotografiert me ä 2dimensionale Code und wird outomatisch uf die entschprächendi Houmpeitsch witergleitet.

Obe dra gsehsch ä sogenannte "BeeTagg". Für das zNatel die 2D-Codes cha läse, muess me zersch gratis ä Reader uf sis Natel abelade.

Wenn dä äs moderners Natel hesch, denn probiers doch am beschte grad us:
1. Zersch äs SMS mit „Bee“ a 989 sände
2. BeeTagg-Reader wird gratis uf zNatel glade
3. BeeTagg obedra fötele und luege was passiert…

Das ganze isch ersch am ufcho. Zum Bischpiu hey si im Appizöllerland a aune Wägwiser so BeeTaggs montiert. Dr Wanderer cha die mit sym Natel fötele und berchunnt grad dr Fahrplan über vom nöchschte Poschtouto.

Di nöischti Kampagne vo Switzerland-Tourismus brucht ou dr BeeTagg.

Unger www.semapedia.org chame wikipedia-Adrässene ine Mobile-Tag umwandle, usdrucke und ufhänke. Zum Bischpiu dAdrässe http://de.wikipedia.org/wiki/Twann umwandle und zTwann am Bahnhof ufhänke. Ä Tourischt wo zTwann usschtigt cha dä Mobile-Tag fötele und weiss grad Bscheid über Twann.

Und das isch ersch dr Aafang. Wie wärs mit somene BeeTagg uf dr Wyetigette. Wenn eym dr Wy gfaut, cha me grad diräkt online mit em Natel äs paar Fläsche bschteäue… äs si auso kener gränze gsetzt.