Theatersport

D'Schwiz isch Europameischter!!! Und zwar im Theatersport.

Paraleäu zur Schuttmeischerschaft het dTheatersport- Europameischterschaft schtattgfungä. Was, du weisch nid was Theatersport isch? Ig erkläres hie churz.

Dasch ä Art Imrovisationstheater. Derzue bruchts zwöi Teams à öppe 3 Lüt, ä Schiedsrichter, ä Bühni & äs Publikum. När git dr Schiri dSchpiuform vor Szene bekannt & zPublikum beschtimmt stichwortartig dr Rahme, wo & wie das die Szene schpiut.

Und när sy die einzelne Teilnähmer gforderet, ohni Abschproch ungerenang ä Szene frei zerfinge und zschpile. Nid grad eyfach, we mä dVorgabe vo dere ersch grad äs paar Sekunde vorhär ghört het. Do isch 200% Improvisationstalänt gforderet!

Am Schluss beschtimmt zPublikum, wöles Team am luschtigschte isch gsy. Das tönt jetzt villecht auäs echley kompliziert, isch aber uhuere luschtig & amüsant.

Letscht Wuche bini zBärn gsy am EM-Schpiu Schwyz gäge Dütschland. D'Schwiz het de trotz ere rote Charte knapp mit 9:8 gäge Dütschland gwunne. Am Schluss het de Schwizer Theatersport- Nationaumannschaft im Finau gäge Frankrych gwunne.

Ig cha jedem mou ä Bsuech ire Theatersportvorfüehrig empfähle. Wie wärs wieder emou mit echley Kultur? Do isch das genau zrichtigä. Sehr amüsant...!