Bielersee überfluetet!

OK, dass es grad eso chunnt hät ig ou nid dänkt. Dr Bielersee isch am letschte Donnschtig so enorm aagschtige, dass grad di ganzi Seematte unger Wasser gsetzt isch worde. Ds Lakesplash 2007 het müesse abgseit wärde.

Gwüssi Lüt hey gmeint, dass dr Schlöisewärter zPort dSchuld het, wüu dr Bielersee eso höch isch gschtige. Däm isch aber nid eso! Für das gits äs interessants Regulierreglemänt, wo das auäs ganz genau beschribe isch. Dr Kanton Bärn verpflichtet sech mit däm, dass dAare bir Kantonsgränze in Murgethal nie meh aus 850 m3 füehrt.

Jetzt isch das ganze gar nid eso eyfach wies ir Theorie beschribe isch (lueg dGrafik obe). Wüu d'Ämme bringt nämlech ou no äs paar m3 Wasser usem Ämmitau.

Dr Kanton Aargau macht jetzt de Bärner dr Vorwurf, sy hey zRegulierreglemänt verlezt und zviu Wasser usem Bielersee glo. Jetzt schteyt ihre ganz Kanton unger Wasser...!

Aber das isch jetzt äuä Jurischte-Fueter und hiuft nümme drüber wäg, das z10. Lakesplash het müesse abgseit wärde (trotz Schwümmbar)!

Hoffe mer ufenes 10. Lakesplash im Johr 2008, das wär geniau!