Picasa

Letscht Wuche ha ig äs paar Biudli knippset vo minere Schi-Toure-Wuche ufem Simplonpass. Und dört hey mir äs paar Kollege gfrogt, öb ig ihne de di Biudli chönnti schicke?

Jetzt gits do äs Ideals Internet-Portal Namens: "Picasa". Do ladisch dini Föteli eyfach iz Internet und när chasch dine Lüt dr Link schicke oder di Biudlis eyfach mit dim Blog verlinke.

Und zBeschte isch; di ganzi Üebig isch gratis. Viu Spass bim luege - oder bim säuber echley Biudlis ids Internet schteäue. Ig bi gschpannt...

Freiw Wi Geb Ks 2007

Ds schönschte Wätter vorusse, äs isch Sunntig, und ig darf wieder eynisch iz Büro go schaffe! Doch am Obe am 11i ha de ou ig Fürobe und när geyts für nes paar Täg uf dTouresch!

Gnauer gseit geits ufe Simplonpass. Ig nime amene Freiwillige Wintergebirgskurs vor Schwizerische Armee teil. Ufem „Dienstbefehl“ schteit unger angerem gschribe:

Zielsetzungen:

Die Kursteilnehmer sollen positive Gebirgserlebnisse erhalten.

Ändi Wuche schribe ig de, öb ig öppis erläbt ha… ;-)

Waudbrandgfahr

Dasch ä veruckti Sach; mir hey Mitti Apriu und äs sött eigetlech zgröschte Apriu-Wätter hersche. Ä so wie mers kenne, eso richtig mit Räge und Sturm und ab und zue no äs paar Santimeter Schnee bis in die Niederungen.

Aber nüt vo däm. Scho syt Tage herrscht dschönschte Wätter! Mir isch das no so rächt! So chame ändlech echley voruse go spaziere & bike und di erschte Apéros und Grilladene vorusse sy ou scho abghaute…

D’Schattesyte vo au däm isch eynersits, dass scho fasch idr ganze Schwiiz Waudbrandgfahr beschteit, und anderersits, dass ide Bärge dr Schnee viu zschnäu drvo schmiuzt. Ig möcht nämlech nächscht Wuche no chley uf dToureschi.

Piz Gloria

Aui Lüt hey nach em Oschterweekend wieder müesse go schaffe. Aui Lüt? Nein! Ig und äs paar Arbeitskollege hey hüt frei gha. Wüu mir hey über d’Oschtere müesse schaffe.

Und was macht me a somene wunderprächtige Tag wie hüt?

Genau, mä geyt go Schi fahre.

Doch zersch hey mer üs no bimene James-Bond-Frühstück zoberscht ufem Schiuthorn gschtercht. Eiger, Mönch und Jungfrou – aber ou dBlüemlisaup, dr Chasseral und dr Thunersee hey üs Gseuschaft gleischtet… Eyfach troumhaft!

ehcB

Am Oschtermäntig hätti frei. Do hani dänkt, ig gange ads Hockeyschpiu Biu gäge Langnou.

Aber jetzt hani hüt am Namittag äs SMS bercho vo mim Brüetsch. Är macht am Oschtermäntig ä Terrassegrillsaison-Iweihigsparty. Und wüu das ä Terminkonflikt nach sich zieht, hani nid gwüsst, wohäre das ig söu go...

Syt äs paar Minute weiss ig jetzt, dass ig ad Terrassegrillsaison-Iweihigsparty gange! Wüu dr EHC Biu het hüt am Obe gäge dTigerchäsli ufä Gring bercho! Schad! Eso schpiut haut dr EHCB leider witerhin ir Nati B und nid ir Nati A! )-;

„Ä schöni Oschtere und viu Glück bim Oschternäschtli sueche“ (-;3

Geschwindigkeitsrekord idr Schwyz

Zum vorige Iitrag isch no dsäge, dass dr TGV oder dr ICE ab mitti Juni 2007 uf dr Strecki Basel - Strasburg - Paris „nume no“ 320 km/h fahre wird. 3 ½ Stung schpöter bisch när scho zParis.

Dr Gschwindigkeitsrekord idr Schwyz isch im Lötschbärg Basistunnäu gmacht worde. Dä Tunnäu geyt zReichenbach im Kandertal ine und chunnt nach 35 km wieder im Wallis - ir Nöchi vo Visp - wieder use. Vores paar Mönet hey si dört 280 km/h ufe Tacho brocht!

Abem 9. Dezämber 2007 fahre sy de i däm Tunnäu „nume no“ 250 km/h! Und das fahrplanmässig. Und faus äs öpper interessiert. Ds Eröffnigsfescht isch am 16. Juni 2007 mit zauriche Extrazüg dür di neui Röhre (Billet gits abem 1. Mai 2007).

TGV

We di öpper frogt: „Wie geyts?“, denn gibt me neuerdings dAntwort: „Mir geyts Knut“. Soviu zum Thema „Knut“…

Eigetlech hani jo über öppis angers wöuä schribe. Nämlech wieder emou chley über dIsebahn.

Hüt am Namittag het nämlech dr TGV uf dr neue Hochgschwindigkeitsstrecki Paris-Strassburg ä neue Gschwindigkeitsrekord für Isebahnfahrzüg ufgschteäut.

Är isch sage und schreibe 574.8 km/h gfahre. Mä cha scho fasch nümm säge 'fahre' sondern scho fasch 'tief gfloge'. Hie äs Video (zersch muesch äs paar Sekunde Wärbig luege).