Winter Gebirgs Kurs Andermatt

Dasch wieder ä Wuche gsy. Z’Wätter in Andermatt isch so ziemlich kataschtrofau gsy. Wenns nid gschneit het, denn hets grägnet, und umgekehrt. Auso ä Wintergebirgskurs mit viu Schnee und dämentsprächend isch ou dLawinegfahr gsy.

So het du de üse Bärgfüehrer nid lang gchaufakteret. Am Morge am 7i simer iz MatMag go Chlätterfinke fasse und när simer mit em Duro uf Göschene abe und düre Gotthard Strossetunäu iz Tessin gfahre. I ha de no ghoffet, dass mer dür irgend sone gheime Schtouä vom Mitlitär fahre. Aber do isch nüd zwöuä gsy. Auäs top secret! Im Tessin si mer de uf Ponte Brolla ine Feäuswang go chlättere. Aaschliessend hey mer no dBier-Reservä vomene typische Tessiner Grotto usgsoffe…

Am Mittwoch hets de scho echley besseret mitem Wätter. Dr ganz Karsumpu vo Schiusrüschtig übere Zwipf bis zum Lupo hey mer i Duro inegschosse und sy wieder düre Gotthard iz Bedrettotau. Dascho ä ängi Röhre dä Gotthardtunnäu! Au 10 bis 15 Sekunde begägnet eym ä Laschtwage. Di ganzi Plastigabdeckig vom Duro het nume no zitteret. Vo All’ Acqua us (1614m) sy mer du när ufe Pizzo Grandinagia (2774m) ufe gschitürelet.

Am Donnschtig sy dVerhäutniss ide zentrale Aupe ou nid eso tiptop gsy. Auso hey mer wieder Verlade und sind „ab in den Süden, der Sonne hinterher“… Vo Ossasco (1313m) sy mer ufegfäunet bis zur nigunagunöiä Cristallinahütte (2568m). Dört aacho zerscht emou dr Iigang müesse finge ungerem Schnee. När natürlich dr Durscht glöscht. Und när natürlech emou zJassdecheli usem Schränkli füreghout. Ä auti Bärgfüehrer Reglä beseit, dass mä bim jasse inere SAC Hütte immer uf soviu Punkte tuet jasse wie dHütte höch isch. So hey mer de äs paar mou uf 2568 Pünkt gjasset.

Am letschte Tag sy mer de no schnäu ufe Cima di Lago (2833m) und ufe Pne Val Piana (2660m). När hey mer ä wunderprächtigi und aaschträngedi Abfahrt gha bis uf All’ Acqua (1614m).

Insegsamt ä gäbigi Wuche gsy. In Andermatt hani di Lokale Produkt dörfe deguschtiere (Träsch, Chrütter, Pony). Und ou dProdukt vom Militär sy ou nid schlächt gsy (Biscuit, Tee mit Antibock ;-))…

Gebirgskurs

Wie scho letschts Johr gange ig ou das Johr für ne Wuche iz Militär. Und das freiwiuwig. Äs isch nämlech ä Gebirgs-Kurs vo dr Schwizer Armee.

Aber meh sägi nid. Wüu äs isch auäs seeehr gheim (siehe Bild oben).

Das Biudli hani gfunge unger www.festung-oberland.ch. Dasch ä Houmpeitsch wo aui (gheime) Bunker vom Bärner Oberland ufgfüehrt sy.

Liga A!

Dr EHCB isch ab sofort wieder idr Nationalliga A!

Mir si vo Biu, dr Stadt am See
Ds Härz schloht füre HCB
Immer da und bereit
Ganz egau wies um öich steit

Nous sommes les Seelandais
Et nous chantons en choeur
Nous sommes les Seelandais
Fidèles à nos couleurs

Und weiss no grad öpper wie zAute EHCB-Liedli geyt..?

Personal Lift

Wäutneuheit uf dr Bettmeraup!

Dr Franz Josef Zurbrigge het ä sogenannte "Personal-Lift" erfunge, wo jede Schifahrer sy eiget Lift scho grad derbi het. Das isch äs Grätli mit Roupe dranne wo mit bsungers leischtigsfähige Batterie funktioniert.

Mä chlemmts eyfach ad Schi und ab geyt dPoscht, nämlich dPischte ümbrüff. Muesch nümme aaschtoh & ke Abi me löse. Biuder gits unger http://www.personallift.ch.