Go Kart...

Am Samschtig bini mit nes paar Bürokollege uf Payerne go Gokart freese. Äs het huere gfägt! Aus Aafänger bini im erschte Durchgang ufem 13. Platz glandet (vo 15). Und nachem dritte bini scho ufem 3te gsy!

Faus öpper jemaus geyt go karte. Nid schüche mi zfroge aus Herusforderer. De gseh mer jo de wär dKurve kriagt… ;-)

Röbi

Uf dFrog, öb är lieber Rote oder Wiise Wy het, het är immer g'antwortet: "Rote trinki de wenn ig aut bi".

Leider chunnt är jetzt nümme derzue Rote Wy ztrinke... Geschter isch mi Grossvater - dr Röbi - im Auter vo 87 Johr gschtorbe. Är isch im Autersheim Mon Repos in La Neuveville nach em ne lange Läbe friedlech iigschlofe.

Röbi, ig bhaute di in gueter Erinnerig!

Porta Alpina

Geschter bini in Sedrun gsy dBouschteäu vom neue Gotthard Basis-Tunnäu und dr Porta Alpina go aaluege. Auäs super spektakulär. Äs wimmlet nume so vo Superlative.

Zum Bischpiu hey mer zersch mit em ne Lift uf zNiveau vom zuekünftige Tunnäu abe müesse. Mit em ne Lift wo 12 Meter pro Sekunde fahrt sy mer mou 800m gäge abe gfahre. Dört sy mer ine Mitsubishi Pajero 4x4 umgschtige und mit em Geolog äs paar km dür zTunnäu gfahre bis ad Tunnäu-Bruscht.

Momentan isch im Nordvortrieb nüt mit schpränge. Ä Bagger isch zGeschtei richtiggehend am abchrauuä. DSchteine wo abechöme chasch mit blosser Hang haubiere bis sy Sand sy. Und das 1000m unger dr Ärdoberflächi!

Virus...?

Wär weiss ä guete Vire-Schutz für mi neu Kompiuter? Bitte unger Comments ergänze. Ä Arbeitskolleg het gmeint kapersky sigi guet?

Virginie à Paris

Aus Cheminot profitiert me vo diverse Schpeziautarife. Drum hani dänkt, ig mache schnäu ä Visite bir Virginie und ar Babs. Die zwöi wöi zParis für nes Johr (reschpektive äs haubs Johr)
wohne & schaffe. Jetzt sy si fliisig uf dr Suechi nach em ne Zimmer ire WG und em ne Job, was gar nid eso eyfach isch.

Aber äbe: anderes Land, andere Sitten. I sore Grossstadt isch auäs echley angers. Zum Bischpiu hey mer dörfe miterläbe, wie öppe 30 Schwarzi üsi Métro blockiert hey. D'Polizei het nid lang uf sech lo warte. Äs paar Minute schpäter sy di obe erwähnte Lüt ar Wang gschtange und dür di ganzi Métro isch äs Düftli vomene biiisende Gas gschwäbt...

Concours National

Vores paar Mönet hani i mim Blog gschribe, dass am "Concours National des Vins Suisse" der bescht Bielersee-Chasselas ä Schafiser isch vom Beat Burkhardt. Jetzt nach langem warte und deguschtiere schteyt fescht, dass es sogar dr zwöit bescht Chasselas vor Schwyz isch!!
Gratulation Bezi & Santé.

Dimension E520 D11E07

Voilà - dä "Schritt nach vorn" isch gmacht. Soäbe hani ä neue Kompiuter bschteäut. Und zwar mit :

Intel® Viiv™ Technology™ Core® 2 Duo® E6300 Processor (1.86GHz, 1066MHz, 2MB) Original Windows® XP Media Center Edition 2005 mit Backup Media CD MCE to Vista Premium Upgrade 2048 MB Dual Channel DDR2 RAM, 533 MHz (2x1024) 320GB (7200rpm) Serial ATA Hard Drive with 8MB DataBurst™ cache 16X DVD+/-RW Drive 256MB ATI Radeon X1300 Pro graphics card 20" UltraSharp™ Wide Aspect Flat Panel.

Und wede jetzt nume no Bahnhof verschtange hesch, de verschtohni das vou und ganz... Aber zum Glück gits do (no) Lüt wo drus chöme. Merci beaucoup a aune womer wyterhguäeffe hey!

Kompiuter

Deheime hani ä auti Chlepperchischte wo scho fasch acht Johr ufem Buggu het. Jetzt macht Mä-2 ä "Schritt nach vorne" und tuet sech ä neue Kompiuter zueche.

Leider bini do zimlech ä Amateur. Do giz Froge über Froge; Prozässer, Arbeitsschpycher, Grafikcharte, etc... Chönnt mer do öpper wyterhäuffe, bevor ig irgend "än Scheiss" bschteäue...